ఓ అమ్మగా నేను..
నువు పలికే కొత్త కొత్త మాటలకి
అర్థాలు మార్చే నిఘంటువునౌతా...
నువు అడిగే వింత ప్రశ్నలకు జవాబులు వెతికే
విజ్ఞాన సర్వస్వం అవుతా...
నువు వేసే తప్పటడుగులు సవరించేందుకు
నీ చుట్టూ చూపుల ప్రాకారం నిర్మిస్తా..
ఎదురుదెబ్బలు నీకెదురు కాకుండా
నా అరిచేతుల మీదుగా నీ అడుగులు వేపిస్తా...
గాఢ నిద్రలో బూచాడు నీ దరికి రాకుండా
తీపి కలల ఊయలలో నిన్ను జోకొడతా..
నువ్వు వికసించే రేపటి సౌధం కొసం
పునాది రాళ్ళు పేర్చే నిత్య శ్రామికురాలిని అవుతా..
ఇవన్నీ ఎందుకంటే.....
´´అమ్మా అని నువ్వు నన్ను అల్లుకున్నందుకు´´